Newyddion

Adeiladu yw un o'r sectorau mwyaf yng Ngogledd Cymru, ond mae merched yn parhau i gael eu tangynrychioli'n sylweddol yn y diwydiant. Yn ôl data diweddaraf gan Portal Sgiliau Gogledd Cymru, dim ond 9.1% o weithlu’r rhanbarth sy’n ferched.

Mae disgwyl i sectorau adeiladu a gweithgynhyrchu Gogledd Cymru dyfu yn y blynyddoedd i ddod, gyda phrosiectau’n amrywio o ddatblygiadau tai i ddewisiadau gweithgynhyrchu gwyrdd. Mae denu mwy o ferched i’r diwydiant yn hanfodol nid yn unig ar gyfer amrywiaeth a chynhwysiant, ond hefyd ar gyfer twf. Mae’n hanfodol mynd i’r afael â’r galw cynyddol am weithwyr medrus.

Ar ôl gweithio yn y diwydiant adeiladu am sawl blwyddyn, mae Mari ar hyn o bryd yn bensaer gyda Saer Architects, dywedodd: “Fel pensaer sydd newydd gymhwyso, mae fy mhrofiad o fewn y maes adeiladu wedi bod yn heriol ond yn foddhaus hefyd - pob dydd, dwi’n cael defnyddio fy nghreadigrwydd i ddylunio gofodau sy’n effeithio’n gadarnhaol ar gymunedau. Er bod y diwydiant yn dal i weithio ar gydbwysedd rhwng merched a dynion, mae lle i ferched adael eu marc. Dwi’n edrych ymlaen i weld mwy o ferched yn llunio dyfodol pensaernïaeth ac adeiladu, gyda’r obaith o greu diwydiant mwy amrywiol ac ysbrydoledig.” 

 “Er mwyn cau’r bwlch rhywedd, dwi’n meddwl bod angen mwy o gynrychiolaeth a chefnogaeth arnom. Mae annog merched i ymchwilio i'r maes yn gynnar, arddangos role models benywaidd, a chefnogi merched sydd mewn rolau arweinyddiaeth yn allweddol. Bydd creu mwy o gyfleoedd ym mhob rhan o’r diwydiant adeiladu yn helpu i leihau’r rhwystrau.

 “Mae fy nghyngor i ferched sy’n ystyried dyfodol yn y maes yn syml: ewch amdani! Mae eich creadigrwydd, angerdd a syniadau yn bwysig; peidiwch â gadael i unrhyw un ddweud yn wahanol. Dewch o hyd i fentoriaid, adeiladwch rwydwaith, ac mae’n rhaid i chi gredu bod posib i chi ffynnu. Efallai ni fydd yn hawdd bob tro, ond mae gwerth o wneud hynny!”

Nod Portal Sgiliau Gogledd Cymru yw mynd i’r afael â’r mater hwn yn uniongyrchol trwy wasanaethu fel yr adnodd i unigolion ddefnyddio ar gyfer chwilio am swyddi, hyfforddiant a chyfleoedd prentisiaeth o fewn y maes adeiladu a thu hwnt. Mae’r platfform yn darparu gwybodaeth am y farchnad lafur, gan helpu unigolion i ddeall tueddiadau diwydiant, gofynion sgiliau, a’r llwybrau gyrfa sydd ar gael yng Ngogledd Cymru.

 “Mae annog mwy o ferched i ystyried gyrfa o fewn y maes adeiladu yn hanfodol ar gyfer dyfodol y diwydiant," yn ôl Sian Lloyd Roberts, Rheolwr Rhanbarthol Partneriaeth Sgiliau Rhanbarthol Gogledd Cymru. "Gan ei bod yn Wythnos Merched mewn Adeiladu a gan y bydd hi’n Ddiwrnod Rhyngwladol y Merched yn fuan, nid oes amser gwell i fynd i’r afael â’r bwlch rhywedd yn y diwydiant ac amlygu’r cyfleoedd sydd ar gael yng Ngogledd Cymru.

 “Mae’r galw am weithwyr medrus yn cynyddu, ac mae cyfleoedd gwych ar gael ar draws amrywiaeth o swyddi. Trwy sicrhau bod merched yn yr ysgol, boed yn staff neu’n ddisgyblion yn cael mynediad at y wybodaeth a’r gefnogaeth gywir, gallwn helpu i adeiladu gweithlu mwy amrywiol a deinamig ar gyfer Gogledd Cymru."  

O brentisiaethau neu swyddi lefel mynediad i rhai arweinyddiaeth, mae’r maes adeiladu yn cynnig opsiynau gyrfa gwych a chyflog da i ferched o bob cefndir. Mae Portal Sgiliau Gogledd Cymru yn cysylltu cyflogwyr, darparwyr hyfforddiant ac unigolion sy’n dymuno cymryd eu camau cyntaf neu ddatblygu eu gyrfaoedd o fewn y sector.

Er mwyn darganfod swyddi gwag , prentisiaethau, a chyfleoedd hyfforddi o fewn y maes adeiladu a thu hwnt, ewch i portal-gogledd. cymru. 

DIWEDD

Ymholiadau am y Portal: helo@portal-gogledd.cymru

Ymholiad gan y cyfryngau: erin@atebcymru.wales neu 07533 514027

Bydd platfform newydd yn agor drysau i bobl a chyflogwyr yng Ngogledd Cymru drwy rannu cyfleoedd gwaith, hyfforddiant, gwybodaeth cyflogadwyedd a cyfleoedd twf o fewn y rhanbarth.

Yr wythnos hon, fe lansiodd Portal Sgiliau Gogledd Cymru sef platfform newydd ar-lein, er mwyn agor drysau i gyfleoedd yn y rhanbarth. Mae’n cynnig mynediad at swyddi, prentisiaethau, a chyfleoedd hyfforddiant yn ogystal a darparu cefnogaeth i gyflogwyr er mwyn datblygu ei gweithle.

Wrth gydweithio gyda partneriaid allweddol, mae’r Partneriaeth Sgiliau Rhanbarthol Gogledd Cymru (RSP) wedi datblygu’r Portal gan ddefnyddio adborth gan gyflogwyr a diwydiant. Roedd yr adborth yn awgrymu y gallai fwy gael ei wneud i helpu pobl a chyflogwyr i ddeall y gwahanol gyfleoedd, hyfforddiant, a chefnogaeth yn y rhanbarth.

Mae'r Portal yn mynd i'r afael â hyn trwy ddarparu hwb i bobl sy’n chwilio am eu cyfle nesaf ac i gyflogwyr sy’n ystyried ehangu eu rhwydweithiau ar gyfer talent lleol. Mae’n ei wneud yn haws i bobl ddeall yr amrywiaeth o opsiynau cyflogadwyedd a’r sgiliau sydd eu hangen yn sectorau twf Gogledd Cymru. Bydd y platfform, sydd am ddim i’w ddefnyddio, yn cynnwys digwyddiadau lleol, adnoddau cyflogadwyedd, ac arweiniad er mwyn hyrwyddo’r cyfleoedd sydd ar gael yn y rhanbarth.

Dywedodd David Roberts, Cadeirydd yr RSP:

"Mae'r Portal yn gam mawr ymlaen i Ogledd Cymru. Trwy roi cyfleoedd a'r gwasanaethau cymorth gwych mewn un lle, rydyn ni’n ei gwneud yn haws i bobl ddeall y llwybrau cyflogadwyedd yn yr ardal, yn ogystal a’r gefnogaeth bwysig ar gyfer gwella recriwtio, cadw a datblygu staff sydd ar gael. Ar yr un pryd, rydyn ni’n mynd i'r afael â'r bylchau sgiliau mae cyflogwyr ar draws y rhanbarth yn eu hwynebu.”

"Mae defnyddio adborth gan gyflogwyr lleol, gwybodaeth am y farchnad lafur, ac ymchwil ranbarthol i ddeall yr heriau yng Ngogledd Cymru wedi bod yn hanfodol. Datblygwyd y Portal gyda'r adborth hwn mewn golwg ac mewn cydweithrediad â rhanddeiliaid allweddol fel colegau rhanbarthol, prifysgolion, darparwyr hyfforddiant annibynnol, Gyrfa Cymru a darparwyr cyflogadwyedd eraill.”

Fel un o bedair partneriaeth ledled Cymru, mae RSP Gogledd Cymru yn dwyn ynghyd gyflogwyr, darparwyr sgiliau a rhanddeiliaid allweddol i ddeall anghenion cyflogwyr yn well ar lefel leol a rhanbarthol. Maent hefyd yn dadansoddi gwybodaeth ranbarthol y farchnad lafur ac adborth gan gyflogwyr, sydd wedyn yn cael ei adrodd i Lywodraeth Cymru. Mae'r RSP yn annog ceiswyr gwaith, pobl a chyflogwyr Gogledd Cymru i wneud y gorau o'r Portal a dod o hyd i'w cyfle nesaf.

Mae Porth Sgiliau Gogledd Cymru wedi derbyn £75,000 gan Lywodraeth y DU drwy Gronfa Ffyniant Gyffredin y DU.

Am fwy o wybodaeth am y Portal, ewch i: https://portal-gogledd.cymru/cy/ neu cysylltwch â reesbrown@uchelgaisgogledd.cymru

Mae’r diwydiant adeiladu yng Ngogledd Cymru mewn amser allweddol, gan wynebu heriau sy’n galw am atebion arloesol. Mae cyflogwyr aelodau o’r Grŵp Clwstwr Cyflogwyr Adeiladu Partneriaeth Sgiliau Rhanbarthol Gogledd Cymru wedi amlygu prif heriau sy’n eu hwynebu ar hyn o bryd:

• Anhawster i ddenu a recriwtio talent (gan gynnwys pobl sydd yn fwy academaidd) i rolau uwch (sydd ddim yn rôl grefft).
• Angen am fwy o amrywiaeth rhywiol ar draws y sector.
• Gweithlu sy’n heneiddio.

I ymateb, mae’r Partneriaeth Sgiliau Rhanbarthol Gogledd Cymru wedi arwain ar ddatblygiad y rhaglen Ysbrydoli i Adeiladu, menter wedi’i ddylunio i fynd i’r afael â’r heriau hyn yn uniongyrchol.

Beth yw Ysbrydoli i Adeiladu?

Mae Ysbrydoli i Adeiladu yn rhaglen ddeinamig sy’n anelu at drawsnewid canfyddiadau o yrfaoedd yn y diwydiant adeiladu, yn enwedig mewn rolau proffesiynol fel rheoliprosiectau, arolwg meintiau, pensaernïaeth, ac eraill y tu hwnt i’r traddodiadol. Mae’n ymdrechu i ddenu ystod amrywiol o unigolion, gan gynnwys menywod, i’r sector, tra’n mynd i’r afael â chynllunio olyniaeth gweithlu.

Yn ei hanfod, mae Ysbrydoli i Adeiladu yn codi ymwybyddiaeth o’r cyfleoedd amrywiol yn y sector adeiladu ac yn darparu’r sgiliau a’r ysbrydoliaeth i weithwyr proffesiynol y dyfodol lwyddo. Trwy gydweithio â CITB a cyflogwyr, mae’r rhaglen yn sicrhau bod ei gweithgareddau yn cyd-fynd ag anghenion y diwydiant a’r gweithlu.

Nid yn unig ar gyfer y rheini sy’n gwybod eu bod am ddilyn gyrfa yn y diwydiant adeiladu y mae’r rhaglen yma – mae’n ceisio ysbrydoli pawb, gan arddangos y posibiliadau a’r llwybrau cyffrous sydd ar gael yn y sector. Mae pob sesiwn yn cael ei arwain gan gyflogwr adeiladu sy’n gweithredu yn y rhanbarth ac yn cynnwys ymweliad safle, gan roi cipolwg ymarferol i gyfranogwyr a’r diwydiant.

Mae Ysbrydoli i Adeiladu hefyd yn darparu gwybodaeth gynhwysfawr am lwybrau i yrfaoedd adeiladu trwy’r coleg, y brifysgol, a phrentisiaethau, gan gynnwys y Brentisiaeth Gradd yn y Diwydiant Adeiladu, a ddechreuodd ym mis Medi. Mae’r dull cynhwysol ac ymarferol yma yn sicrhau bod unigolion o bob cefndir yn gallu darganfod a dilyn cyfleoedd gwerth chweil yn y sector adeiladu.

Ateb Cydweithredol:

Wedi’i ddatblygu trwy ddull partneriaeth, mae Ysbrydoli i Adeiladu yn cynrychioli ymdrech ar y cyd gyda CITB, cyflogwyr, colegau, Gyrfa Cymru, Adran Addysg Awdurdodau Lleol a ysgolion uwchradd, wedi’i gydlynu gan y Bartneriaeth Sgiliau Rhanbarthol Gogledd Cymru. Mae’r model yma yn sicrhau bod y rhaglen yn aros yn seiliedig ar ymarferoldeb y sector adeiladu a ysgolion wrth feithrin ymrwymiad ar y cyd i’w llwyddiant hirdymor.

Llwyddiant y Peilot ar Ynys Môn:

Mae’r rhaglen a gynhaliwyd yn beilot ar Ynys Môn wedi dangos canlyniadau addawol, gan amlygu effaith gadarnhaol ar ddysgwyr a chyflogwyr.

Cymerodd pedwar ar ddeg o ddysgwyr (gan gynnwys 4 menyw) o bedair ysgol uwchradd ar Ynys Môn ran yn y rhaglen chwe wythnos, a gynhaliwyd yn yr adran adeiladu yn Coleg Menai Llangefni ar ôl ysgol bob dydd Mawrth. Roedd y rhaglen yn cynnwys ymweliad safle wedi’i arwain gan Kier Construction yn eu safle Rheoli Ffiniau ym Mhorthladd Caergybi, gan roi mewnwelediad ymarferol i’r diwydiant adeiladu.

Roedd cyflogwyr a gymerodd rhan weithredol yn y peilot drwy arwain sesiynau yn cynnwys, Read Construction, Griffiths, Wynne Construction, a phrosiect Morlais gan Menter Môn, gan sicrhau cysylltiad cryf rhwng y dysgwyr a gweithwyr proffesiynol y diwydiant.

Mae adborth gan y dysgwyr yn tynnu sylw at pa mor effeithiol yw’r rhaglen:

• Dysgon nhw sgiliau gwerthfawr y mae cyflogwyr yn eu gwerthfawrogi, megis datrys problemau, cyfathrebu, cyflwyno, gwaith tîm, arweinyddiaeth a rheolaeth.
• Dywedodd y dysgwyr eu bod bellach yn teimlo’n fwy gwybodus am y mathau o swyddi sydd ar gael yn y sector a’r llwybrau i’r rolau hyn, gan wneud eu camau gyrfa nesaf ar ôl gadael yr ysgol yn fwy clir.
• Mae’r dysgwyr yn gwerthfawrogi’r cyfle i adeiladu eu rhwydweithiau proffesiynol a sefydlu cysylltiadau â chyflogwyr.

Mae un stori lwyddiant yn sefyll allan yn cynnwys dysgwr a estynnodd allan yn annibynnol at gyflogwr y tu allan i’r sesiynau ac sydd eisoes wedi trefnu profiad gwaith ar gyfer yr haf, gan ddangos gallu’r rhaglen i ysbrydoli menter ac i ddarparu cyfleoedd gyrfa pendant.

Camau Nesaf:

Gyda llwyddiant peilot Ynys Môn fel sylfaen, mae cynlluniau barhaus i ehangu’r rhaglen Ysbrydoli i Adeiladu ar draws Gogledd Cymru. Am ragor o wybodaeth neu i gymryd rhan yn y cam nesaf o Ysbrydoli i Adeiladu, anogir darparwyr a chyflogwyr i gysylltu â’r Partneriaeth Sgiliau Rhanbarthol Gogledd Cymru: Info@rspnorth.wales.

Gwyliwch Uchafbwyntiau’r Rhaglen: Gwyliwch fideo sy’n dangos uchafbwyntiau’r rhaglen beilot, gan gynnwys tysteb gan ddysgwyr, cyflogwyr a rhanddeiliaid am ganlyniad ei effaith.

Daeth busnesau o bob rhan o’r gogledd at ei gilydd yn Venue Cymru, Llandudno'r wythnos diwethaf i rannu profiadau a chlywed gan arbenigwyr ar faterion yn gysylltiedig â'r gweithlu – o  bontio’r bwlch sgiliau i reoli gweithwyr Gen Z.

Mewn cynhadledd wedi ei threfnu gan Bartneriaeth Sgiliau Rhanbarthol Gogledd Cymru (PSR), daeth dros 150 o gynrychiolwyr busnes, gan gynnwys llawer o enwau amlwg y rhanbarth, at ei gilydd i ddysgu a thrafod. Craig Weeks Cyfarwyddwr JCB, Wrecsam oedd y prif siaradwr, cymerodd y cyfle i rannu ei stori bersonol a’i safbwynt o ar ddatblygu sgiliau. Cafodd mynychwyr hefyd glywed gan banel o arbenigwyr oedd yn rhoi eu barn ac yn cynnig atebion i rai o’r prif heriau sy'n gysylltiedig â denu a chadw talent.

Wrth agor y gynhadledd, pwysleisiodd David Roberts, cadeirydd y PSR arwyddocâd y digwyddiad fel llwyfan pwysig i gyflogwyr fynd i'r afael â’r materion maen nhw’n eu wynebu wrth reoli gweithwyr. Gan edrych yn ôl ar y diwrnod, mae’n awyddus i annog cyflogwyr i rannu’r cyfrifoldeb o ran addasu ac arloesi er mwyn sicrhau gweithlu gyda sgiliau addas ar gyfer y dyfodol.

Dywedodd David: "Elfen bwysig o greu cynllun sgiliau a chyflogadwyedd y rhanbarth oedd ymgynghori gydag arweinwyr cwmnïau i ddeall yr heriau maen nhw’n eu hwynebu.

"Gyda recriwtio a chadw talent yn holl bwysig, rydym yn gobeithio bod y gynhadledd wedi helpu busnesau bach a chanolig i gysylltu â sefydliadau addysg a hyfforddiant, nid yn unig i sicrhau eu twf eu hunain ond i hybu gwytnwch a ffyniant yn y rhanbarth.

"Roedd y diwrnod yn llawn cyfleoedd i gael cyngor hefyd. Ac o'r adborth rydym eisoes wedi'i dderbyn, mae'r cyflogwyr oedd yn bresennol yn teimlo'n fwy hyderus wrth fynd i chwilio am gefnogaeth addas."

Ychwanegodd Sian Lloyd Roberts, Rheolwr Sgiliau Rhanbarthol: "Roedd yn wych croesawu sefydliadau o gymaint o sectorau gwahanol i'r gynhadledd – roedd yn gyfle i ni edrych ar yr hyn sy’n gyffredin rhwng busnesau a sut y gallwn weithio efo’n gilydd i fynd i'r afael â rhai o'r heriau sydd o’n blaenau ni gyd.

"Rydym yn gwybod bod denu a chadw talent yn anodd, felly roedden ni’n awyddus i ddod â phawb at ei gilydd i drafod yr atebion i rai o'r materion yma."

Yn ogystal â chlywed gan David Roberts a Craig Weeks, roedd siaradwyr y yn cynnwys Alwen Williams, Cyfarwyddwr Portffolio Uchelgais Gogledd Cymru; Mike Learmond o’r FSB; a Nia Bennet, Cadeirydd Urdd Gobaith Cymru. Cynhaliwyd gweithdai arbenigol gan Dafydd Bowen, Cyfarwyddwr Gweithrediadau Menter a Busnes, a Lesley Griffiths Pennaeth CIPD Cymru.

Roedd rhai o bartneriaid PSR wedi cymryd rhan yn y gynhadledd hefyd gyda stondinau ac arddangosfa i roi cyfle i  sefydliadau a busnesau drafod anghenion sgiliau yn uniongyrchol gyda’r arbenigwyr.

Mae denu, datblygu a chadw talent yn dal i fod yn un o'r prif heriau sy'n wynebu busnesau Gogledd Cymru, yn ôl ymchwil diweddar gan Bartneriaeth Sgiliau Rhanbarthol Gogledd Cymru (PSR). I ymateb i hyn, mae digwyddiad wedi'i gyhoeddi i ganiatáu i fusnesau, arweinwyr diwydiant a gweithwyr proffesiynol gael cyfle i ddarganfod atebion i oresgyn rhai o'r materion yma.

Yn y digwyddiad, gaiff ei gynnal yn Venue Cymru, Llandudno ar y 26ain o Ebrill, bydd busnesau'n clywed gan arbenigwyr am reoli eu gweithlu, ac yn cael rhannu profiadau a gwersi gwerthfawr ar ddod yn gyflogwr o ddewis.  Prif siaradwr y dydd fydd Craig Weeks, Cyfarwyddwr Gweithredu JCB yn Wrecsam.

Ers i Craig ymuno â'r cwmni, mae JCB wedi tyfu ac erbyn hyn mae gan y busnes dros 22 o ffatrïoedd ledled y byd, mwy na 750 o fasnachwyr a 11,000 o weithwyr. Wrth edrych ymlaen at y digwyddiad, dywedodd Craig: "Rwy'n gwybod mai'r gweithlu yw'r ased mwyaf gwerthfawr sydd gan unrhyw fusnes, ac rwy'n deall pwysigrwydd datblygu tîm effeithiol a'r heriau sy'n dod yn sgil hynny. Dechreuais weithio i JCB 29 mlynedd yn ôl yn y gweithdy – rydw i wedi gweithio fy ffordd i fyny ac wedi dysgu llawer ar hyd y ffordd. Rwy'n edrych ymlaen at  rannu fy stori gyda chydweithwyr o Ogledd Cymru, a gobeithio y gall yr hyn fydd gen i ddweud helpu a hyd yn oed ysbrydoli eraill."

Yn ogystal â chlywed gan Craig, mae siaradwyr y digwyddiad yn cynnwys Alwen Williams, Cyfarwyddwr Portffolio o Uchelgais Gogledd Cymru a David Roberts, Cadeirydd Partneriaeth Sgiliau Rhanbarthol Gogledd Cymru.

Roedd David yn arweinydd Adnoddau Dynol yn flaenorol ac yn gyfrifol am oruchwylio twf sefydliad i 950 o staff ar draws 25 lleoliad. Mae bellach yn rhedeg ‘The Alternative Board’ yng Ngogledd Cymru, ac yn cefnogi arweinwyr busnesau bach a chanolig i gyflawni eu targedau. Ychwanegodd: "Rwy'n falch iawn bod y PSR yn cynnal y digwyddiad hwn i gyflogwyr. Wedi gweithio ym maes adnoddau dynol, a rŵan yn cefnogi busnesau bach a chanolig mewn swyddogaeth ymgynghorol, mae gen i brofiad o heriau recriwtio a chadw gweithwyr.

"Bydd hwn yn gyfle gwych i fusnesau gyfarfod a dysgu gan ei gilydd.  Ar draws sawl sector, rydyn ni i gyd yn wynebu materion tebyg - bydd digwyddiad fel hwn yn rhoi llwyfan i ni drafod yr atebion ac arferion gorau."

Bydd trafodaeth banel gyda chynrychiolwyr o'r gymuned fusnes leol a Federation of Small Businesses yn cael ei chynnal, a bydd gweithdai mwy penodol yn rhoi cyfle i gynrychiolwyr fynd yn ddyfnach i rai o'r prif faterion a chael cyngor arbenigol.

Mae'r digwyddiad, a gynhelir gan Bartneriaeth Sgiliau Rhanbarthol Gogledd Cymru, yn agored i fusnesau o bob maint ac o unrhyw ddiwydiant sydd eisiau cymorth gyda recriwtio, cadw a datblygu gweithwyr. Gyda niferoedd yn gyfyngedig, mae’r RSP yn annog busnesau sydd â diddordeb mewn mynychu i archebu eu lle trwy’r ddolen yma.

Bydd cyfle hefyd i rwydweithio yno a bydd arddangosfa ‘cwrdd â’r arbenigwyr’ gyda sefydliadau sy’n cefnogi cyflogwyr gyda heriau eu gweithlu.

DIWEDD

Dolen i gofrestru: Taclo Heriau Gweithlu a Sgiliau | Navigating Workforce and Skill Challenges Tickets, Fri 26 Apr 2024 at 09:00 | Eventbrite